Теләнче-Тамакта «Күрше фест» һәм Гаилә бәйрәме гөрләде

Бу көнне бәйрәм мәйданы йөзләрчә авылдашлар һәм кунаклар өчен бердәм интерактив мәйданчыкка әверелде. Оештыручылар һәр яшьтәге катнашучы өчен аерым кызыклы чара әзерләгән иде. Иң нәниләр үзләренең төсле транспортларында «Коляскалар парады»нда катнаштылар.

Биредә ата-аналар үзләренең фантазияләрен тулы көчкә җиккән иде: балалар коляскалары шарлар белән генә бизәлеп калмаган, хәтта зур кит балыгы формасындагы уникаль коляскалар да бар иде.

Мәйданның бер ягында «Аш-су кунакханәсе» һәм алмашу ярминкәсе эшләсә, икенче ягында — «Борчу белмәс куллар» («Руки не для скуки») иҗат остаханәсендә эш кайнады. Биредә балалар остазлар җитәкчелегендә тегү серләренә өйрәнделәр һәм үз куллары белән ясаган иҗат эшләрен истәлек итеп өйләренә алып кайттылар.

Шулай ук һәр гаилә «теләкләр агачында» үзенең иң изге теләген калдыра алды.

Тамашачыларда чиксез соклану һәм дәрт уятучы мизгел — үсмерләр чыгышы булды. Мәйданга зур тавыш белән мотоциклларда һәм питбайкларда яшүсмерләр килеп кергәч, бөтен халык алкышларга күмелде.

Бу заманча техника парадын бик үзенчәлекле рәвештә тракторлар колоннасы дәвам итте — мәйданда кечкенә бакча тракторларыннан алып иң зур авыл хуҗалыгы гигантларына кадәр күрергә мөмкин иде.

Бәйрәмнең күңелле һәм татлы мизгеле исә — иң нәниләр арасында узган «Бәбиләр ярышы» (Забег ползунков) булды. Йөрергә әле өйрәнмәгән, дөньяны шуышып кына танучы нәниләр финиш сызыгына таба омтылды. Биредә балаларын беренче итәр өчен ата-аналарның төрле хәйләләргә баруын күреп, бөтен мәйдан дулкынланды да, көлде дә.

Бу онытылмаслык көн бию марафоны белән тәмамланды — балалар шаян Панда һәм Чебурашка белән уйный алды.

Бәйрәмнең иң соңгы һәм күркәм аккорды булып, кичке күк йөзен яктырткан искиткеч зур салют торды. Чара һәркемнең күңеленә хуш килде.